يسرية محمد الحسن
رجال من الزمن الجميل(4)
ترجل من بالسيارات خلفنا ....والحمد لله فضت الخناقه. وانتهت علي خير بعد تدخل الاجاويد .....كم انت عظيم. شعبي !!...لولا الجوديه هذه التي نتميز بها عن سائر شعوب لامتلأت أقسام الشرطة بالموقفين...والسجون كذلك.....ما اروعك. شعب السودان !!....واصلنا المسير نحو جبيل الطينه مسقط راس الراسمالي الكبير رجل البر والاحسان بابكر حامد موسي الشهير بود الجبل ...اتخذ سائق السيارة مسارا لاول مره اعرفه ...وكان بمحاذاة النيل الأبيض من الجهة الشمالية للنهر .....طريق ترابي تنهبه السيارات في غدوها. ورواحها ....طريق رائع وجميل والنيل الأبيض علي يسارنا. كاروع ما يكون في ذياك الصباح الباهي !!....محدثنا فاكهه مجالس العاصمة د. عوض دكام يؤانسنا. تاره بكيفية الزج به في اتون ما يعرف بالدورة الحتمية الإنقاذية للقيادات العليا والتي كان يساق اليها كل الدرجات الوظيفية الرفيعة في الدولة. غصبا !!... وكيف وانه ومن مطلوباتها لبس قميص وسروال دموريه وحلق الراس زيروو !!...والتقشف الشديد للخروج من عالم دعه المدنيه الي عوالم الجهاد والمجاهدين !!!........اصلو ابيت ليهم كولو. كولو !!...قلت ليهم انا نجم....وفنان .... وشعري ده صارف عليهو دم قلبي ما عشان تجوا انتو تحلقوهو لي !!.......التعلمجي زولا كده ود خال ...لامن شفتو اتكيفت شديد ...قلت الجنس للجنس رحمه .....مشيت ليهو برااحه بي ورا الجماعه .....سلمت عليهو ما عرفني قلت ليهو. انا دكتور ....!!وقبال اقول اسمي نهرني ......اسمع يا زول هنا لا بنعرف دكتور. ولا ما دكتور !!...انت هنا مستجد ..!!...تسمع تعليمات وتنفذ بس !!... كلام كتير ما دايرنوو !!...ولا بختك اداره !!...قلت ليهو طيب اداره دي شنو !!؟...يعني ما عارف !!.... امال دكتور. كيف !!...كلكم كذابين .... واحد يجي يقول ليك انا ابوي الترابي !!....شوف يا مستجد انا اسمي خميس وتاني اكان لقيتك هنا بوقفك اداره لامن تاااامن!!!.....امش ارجع الطابور !!.....لا حول ولا قوه الا بالله العلي العظيم ....!!ده شنو ده !!؟.دي مصيبه شنو دي الوقعونا فيها الكيزان ديل !!... مالنا نحن. ومال الجهاد والمجاهدين !!!.... طبعا في سري. كوولوو الكلام ده قلتو ...!!وقلت اخير ياعوض تمشي قبال الزول ده يطبق فيك نظريتو القالا قبيل ديك...حقت الجياشه دي...يوقفني اداره. وما عارف شنو حقت الكيزان دي !!!...........وقفنا خميس ده طابور وعيونكم ما تشوف الا النور .....الطابور مدور من اربعه صباحا ولي الساعه تسعه ....جكه....جكه.... وخميس ده وجماعه مننا من الدفعه...اتاريهم كيزان !!!.... لانو لامن يقول الجلالات حقتم ديك الجماعه يشيلوا معاهو .....كل شئ لله....كل شئ لله ...كل شئ لله....!!...قطعوا قلبنا بالجري الله لا كسبم الكيزان !!....لكين عندهم جلاله من الجلالات دي سمحه. عجبتني ....حفظتها كمان !!... لحن جميل كيف !!..يكيفك صااح !!.. ورمقني بنظره وهو يواصل...وردي حقك ده ما بقدر يلحن زيوو ...!!لا تقولي لي المستحيل. ولا صدفه. ولا الوصيه ولا حقت الدوش السمحه ديك...قلت ارحل !!..ويضحك هذه المره بعد ان كان يبتسم فقط وهو يحكي .....الجلاله السمحه حقتم دي بقولوا. فيها...انا ماشي نيالة ...او...او...او..انا ماشي نيالا ..سمبلا...!!...نتساءل. ونحن نضحك....سمبلا دي شنو يا دكتور ؟!!.......وانا عارفا ليكم ؟!! ما ياهو ده كلام الجياشه ديل....قاطعنوا. من راسم !!...
...غدا نواصل......
